GALLERY

Basel 2019│Tag Heuer Autavia

27 March, 2019

 亮點︰人人都玩復刻但邊夠佢咁認真?

近幾年,復刻舊作品已在腕錶界蔚然成風。不過人復刻你復刻,你可以好求其在歷史archive上督隻出來,然後叫班錶匠fine tune一下外觀設計,再放個平時用開的自家機芯,跟手灑點金錢包裝個歷史故仔做做廣告宣傳,搞掂。但亦有人選擇好認真地對待復刻這件事,認真到一個地步是,你會想同佢講︰你係咪傻架?Tag Heuer Autavia就是這樣一個case

故事先回塑到2016年,Tag Heuer為了慶祝品牌靈魂人物Jack Heuer翌年的85歲壽辰,於是計劃復刻他其中一款最心愛的作品──由他在1962年親自創製的Autavia錶款。由於件事是為了Jack長老而做,故此一開始便決定搞得好好睇睇,在2016年春天史無前例地舉行了一場名為「Autavia Cup」的評選活動,由五萬位收藏家、品牌粉絲及鐘錶行家一人一票,選出「最想復刻的Autavia錶款」,認真大陣仗。

問題是,點解有得揀?60年代Autavia錶款不是只得一個樣嗎?揀甚麼?此言差矣。因為在當年,Autavia錶款過癮在它其實是沒有一個固定的設計,而且外觀甚至很參差,單副盤、雙副盤甚至三副盤都有;計時款、軍錶款或潛水款都有;黑白型酷配色以至七彩繽紛配色都曾先後出現,故此要在芸芸Autavia錶款中揀一隻出來做復刻,應該連Jack老本人都會好頭痛,難怪最後會將個波交俾廣大錶迷。

最後,這五萬個錶迷從16款復古Autavia錶款中選出了1966年由F1車手Jochen Rindt佩戴的Autavia Rindt腕錶、編號Autavia Ref. 2446 Mark 3作為最高得票者,並在2017Basel錶展上推出了限量1932枚的Autavia復刻錶款。

鏡頭一轉回到今年Basel錶展,品牌眼見2017年推出的Autavia復刻錶款大受歡迎,而且說到尾它始終是Jack長老的愛寵,於是今年宣佈將Autavia「升呢」變成了一個常設系列,與CarreraMonacoFormula 1AquaracerLink等系列平起平坐。

Autavia的名稱由AUTomobile(汽車)和AVIAtion(航空)構成,1933年至1957年間,Autavia是一種用於賽車和飛機儀錶板的計時器,而在Autavia儀錶板計時器停止生產後,Jack Heuer決定用它作為1962年推出的計時腕錶命名,而這Autavia錶款於196070年代盛極一時,到了1985年才停產。如今,它又被品牌欽點再度翻生,而且黃袍加身,好鬼光彩!

成為常設系列後,今年首先一口氣推出七個全新錶款,搭載Calibre 5自動機械機芯及全新自製Isograph游絲,這游絲以碳纖維代表傳統材質,優點是輕巧及密度低,幾乎不受重力與撞擊的影響,並且完全具有防磁性。配42毫米精鋼或青銅錶殼,精鋼或鈦金屬錶底蓋上鑴刻螺旋槳與輪胎圖案,巧妙呼應系列的豐富傳承。

TEXT / JOEL LEUNG